Przed kanonizacją pòwsta piesniô „Swiãti Janie Pawle”, w chtërny ùjãté są słowa Òjca Swiãtégò do Kaszëbów. Chto spiéwô dwa razë sã mòdli, temù w Spòdleczny Szkòle miona Jana Trepczika w Miszewie i Zespòle Szkòłów w Czeczewie zrodza sã ùdba, żebë w òsoblewi spòsób prawie ną spiéwą pòdzãkòwac.
Wespół ze szkòłowima dzecama wezmë sã za ùczbã ti spiéwë i pòspólno z TV Wybrzeże, Radiã Koszalin, Radiã Kaszëbë, przë wspòmóżce „Dzennika Bôłtëcczégò” i jinszich gazétów a mediów, przë zapôlonëch swiéczkach, wespół z familią i drëchama, chcemë jã zaspiewac w niedzelã 27.04.14 rokù ò gòdzënie 21.00, a tej wiele razy pózni doma, w szkòle a Kòscele.
Szkólny i starszi - ùczmë wszëtczich! Piesniô w wëkònanim karna „Młodzëzna” je na youtube: https://www.youtube.com/watch?v=tOJBMoZ0BRk
Prosymë ò rozpropagòwanié ny ùdbë téż westrzód karnów spiéwającëch i wszelejaczich drëchów, chtërnym miłô je Kaszëbskô Tatczëzna.
Swiãti Janie Pawle
Bògati dëchã lud
Chòc przez wieczi zgardzony
Sã w kùńcu natkł na cud
Swiãtą mòcą sprawiony.
Jan Paweł Drëdżi rzekł:
Môta dbac ò juwernosc,
Dozerac rodny zwëk
W se bënë pòczëc wòlnosc.
Ref. Le swiãti człowiek mógł
Tak dalek widzec
I nôbëlniészą z dróg
Kaszëbóm wzbùdzëc.
Za mądri òjców spôdk
I swój jãzëk sã jëmac
Gò ùczëc wszëtczich dzôtk,
A wiedno z Bògã trzëmac!
Pòdzãczi slemë wińc
Za pòtãżné te słowa.
Bë chcałë le jesz dińc
Pòd kòżdëchną pòsowã.
Ref. Le swiãti człowiek mógł...
